கலாநிதி தெட்சணாமூர்த்தி பிரதீபன் அவர்கள், சுவாமி விபுலாநந்த இசை நடனக் கல்லூரியில் இசைத்துறையில் டிப்ளோமா பட்டம் பெற்றார். அதனைத் தொடர்ந்து, இந்தியாவில் தமிழ்நாட்டிலுள்ள அண்ணாமலைப் பல்கலைக்கழகத்தில் இசைத்துறையில் இளநிலை இசையியல் (B.Music), முதுநிலை இசையியல் (M.Music) பட்டங்களைப் பெற்றார். அதன்பிறகு, இந்தியாவில், தமிழ்நாட்டிலுள்ள தஞ்சாவூர், தமிழ்ப் பல்கலைக்கழகத்தில் முனைவர் பட்டத்தினைப் பெற்றுள்ளார்.

யாழ்ப்பாணப் பல்கலைக்கழகத்தில் தற்காலிக விரிவுரையாளராகவும், இலங்கை, தென்கிழக்குப் பல்கலைக்கழகத்தில் தற்காலிக விரிவுரையாளராகவும் கடமையாற்றி, கிழக்குப் பல்கலைக் கழகம், சுவாமி விபுலாநந்த அழகியல் கற்கைகள் நிறுவகத்தில் இசைத்துறைத் தலைவராகவும் கடமையாற்றினார். தற்போது சிரேஷ்ட விரிவுரையாளராகக் கடமையாற்றி வருகிறார்.

பல்கலைக்கழகக் கற்றலின் போது NCAS புலமைப் பரிசிலைப் பெற்றுக் கொண்டதோடு, அதிக மதிப்பெண்களைப் பெற்றுக் கொண்டதற்காக விருதுச் சான்றிதழினையும் பெற்றிருக்கிறார். இவரது முனைவர் பட்ட ஆய்வின் ஊடாக “தமிழ்” எனும் பெயரில் ஒரு தாள இசைக் கருவியொன்றினைப் புதிதாக வடிவமைத்து அறிமுகப்படுத்தியிருக்கின்றார். தற்பொழுது அதற்கான உரிமத்தினைப் பெற்றுக் கொள்வதற்கான முயற்சிகளை முன்னெடுத்து வருகின்றார்.

இலங்கையில் மட்டுமின்றி வெளிநாடுகளிலும் ஆய்வரங்குகளில் கலந்து சிறப்பித்து வருவதோடு ஆய்வுக்கட்டுரைகளையும் சமர்ப்பித்தும் வருகின்றார்.

இலங்கையிலும், வெளிநாடுகளிலும் இசை தொடர்பான நிறுவனங்களில் முக்கியப் பொறுப்புக்களில் கடமையாற்றி வருவதோடு புதிய பாடத்திட்டவரைவுகள், இசைக்கச்சேரிகள் செய்தல், நாடகங்களுக்கு இசையமைத்தல், நடனங்களுக்குப் பக்க இசை வழங்குதல், தமிழர்களின் இசைக்கருவிகளை ஒன்றிணைத்து இன்னிய அணிகளை உருவாக்குதல் என இவரின் பணிகள் தொடர்ந்து கொண்டிருக்கின்றன.