சென்னைப் பல்கலைக்கழகத்தில் 1970 ஆம் ஆண்டில் வேதியியலில் முதுகலைப்பட்டம், 1984 ஆம் ஆண்டில் கேரள மாநிலம், கோழிக்கோடு பல்கலைக்கழகத்தில் வேதியியலில் முனைவர் பட்டம் பெற்ற இவர் முப்பது வருடத்திற்கும் மேலாகப் பேராசிரியராகப் பணியாற்றியவர். அறிவியல் ஆய்வு இதழ்களில், இவரது 25க்கும் மேற்பட்ட ஆய்வுக் கட்டுரைகள் வெளியாகி இருக்கின்றன. பேராசிரியர் பணிக்குப் பின்பு, கரித்தூள் சிகிச்சையில் ஆர்வம் கொண்டு, பல்வேறு புதிய நுட்பங்களைக் கண்டறிந்த இவர், பெங்களூர், கித்வாய் நினைவு புற்றுநோய் நிலையத்தில் கரித்தூள் சிகிச்சை வல்லுநராகவும், தன்னார்வ நோய்த் தணிப்புக் கண்காணிப்பாளராகவும் சேவை செய்து வந்தார். ஆங்கில மருத்துவர்களால் கைவிடப்பட்ட சில நோயாளிகளுக்கு கரி, வெள்ளி ஆகியவற்றைப் பயன்படுத்தி, அவர்களது நோயை நீக்கி முழுமையாக நலமடையச் செய்திருக்கிறார். சிலரது நோயின் வலியைக் குறைத்து, அவர்கள் வேதனையைப் போக்கியிருக்கிறார். தற்போது இலண்டனில் வசித்து வரும் இவருக்கு, கடுமையான நோய்களால் பாதிக்கப்பட்டவர்களுக்கு கரி உள்ளிட்ட சாதாரண பயன்பாட்டுப் பொருட்களைக் கொண்டு எளிமையான முறையில் சிகிச்சை செய்ய முடியும் என்கிற நம்பிக்கையில் பலருக்கும் தனது சிகிச்சை முறைகளை அறிமுகப்படுத்தி வருகிறார்.

இத்தகைய சிறப்புடைய இவருக்கு தேனித் தமிழ்ச்சங்கமும் சி. பா. ஆதித்தனார் தமிழியல் ஆய்வுக் கழகமும் இணைந்து " சொற்சுவைத் தேனீ " எனும் விருதினை வழங்கிச் சிறப்பித்துள்ளது.