தேனி மாவட்டம், பழனிசெட்டிபட்டியைச் சேர்ந்த மு. சுப்பிரமணி - தாமரைச்செல்வி இணையருக்கு 21-3-1999 ஆம் ஆண்டில் மகளாகப் பிறந்த மு. சு. முத்துக்கமலம், கணித அறிவியலில் முதுநிலைப் பட்டம் பெற்றவர். தரவு உள்ளீட்டாளர் (Data Entry Operator) பட்டயப்படிப்பு, வலைப்பக்க வடிவமைப்பு (Web Design) பட்டயப் படிப்பு, இதழியல் மற்றும் மக்கள் தகவல் தொடர்பியல் (Journalism and Mass Communication) பட்டயப்படிப்பு ஆகியவைகளையும் முடித்திருக்கிறார். இந்தி மொழியில் ‘பிரவீன் உத்தாரத்’ சான்றிதழ் பெற்றிருக்கிறார். பள்ளியில் படிக்கும் போதேப் பல்வேறு போட்டிகளில் பங்கு பெற்று பல்வேறு பரிசுகளைப் பெற்றவர். பள்ளியில் படிக்கும் காலத்தில் இந்திய அஞ்சல் துறை நடத்திய கடிதம் எழுதும் போட்டியில் தேனி மாவட்ட அளவில் இரண்டாம் பரிசு பெற்றவர். முத்துக்கமலம் பன்னாட்டுத் தமிழ் மின்னிதழின் ஆசிரியர் குழுவில் ஒருவராகவும் இருந்து வருகிறார்.

தேனித் தமிழ்ச் சங்கம் மற்றும் சி.பா.ஆதித்தனார் தமிழியல் ஆய்வுக் கழகம் இணைந்து கடந்த மூன்று ஆண்டுகளாக (2020-2022) நடத்தி வந்த “இணைய வழி தமிழியல் உரைகள்” என்னும் தொடர் நிகழ்வில் உரையாளர்களின் படங்களைத் திரைக்காட்சியாகப் பதிவு செய்தல், பங்கேற்பாளர்கள் பட்டியலைத் தயாரித்தல், உரைகளை நிகழ்படமாகப் பதிவு செய்து, வலையொளியில் (youtube) பதிவு செய்தல் போன்ற கணினித் தொழில்நுட்பப் பணிகளைச் செய்திருக்கிறார்.

இத்தகைய சிறப்புடைய இவருக்கு தேனித் தமிழ்ச்சங்கமும் சி. பா. ஆதித்தனார் தமிழியல் ஆய்வுக் கழகமும் இணைந்து " தமிழ்ச்சேவைத் தேனீ " எனும் விருதினை வழங்கிச் சிறப்பித்துள்ளது.