மதுரை மாநகரில் த. ஜான் காசிராஜன் - ஜெ. ஷீபா வாணி ஆகியோரின் இரண்டாவது புதல்வியான ஜா. ஜூலி பிரதிபா, 1976 ஆம் ஆண்டு ஜூன் மாதம் பிறந்தவர். பி. கு. ராஜன் பாபுவை மணாளனாகக் கொண்ட இவருக்கு ஜெபஸ், ஜேன் என்ற இரண்டு பிள்ளைகள் இருக்கின்றனர்.

தமது பள்ளிப்படிப்பைக் கேப்ரன் ஹால் பெண்கள் மேல்நிலைப் பள்ளியில் பயின்றார். இளநிலை மற்றும் முதுநிலை பட்டப்படிப்பை மதுரையிலுள்ள டோக் பெருமாட்டி கல்லூரியில் முடித்தார். இளங்கலை கல்வியியல் கல்வியைச் சென்னையிலுள்ள வெல்லிங்டன் கல்வியியல் கல்லூரியிலும், ஆய்வியல் நிறைஞர் கல்வியை மதுரை பாத்திமா கல்லூரியிலும் பயின்றார். மதுரை டோக் பெருமாட்டி கல்லூரியில் 'திரு.வி.க.வின் எழுத்தாளுமை' எனும் தலைப்பில் முனைவர் மூ. தமிழரசி அவர்களின் நெறியாளுகையின் கீழ் ஆய்வு மேற்கொண்டு முனைவர் பட்டத்தினை உயர்தர மதிப்பீட்டுடன் பெற்றவர். கல்வெட்டியலில் சான்றிதழ் படிப்பையும் முடித்துள்ளார்.

2005ஆம் ஆண்டு முதல் மதுரை டோக் பெருமாட்டி கல்லூரி, தமிழ்த்துறையில் உதவிப் பேராசிரியராகப் பணியாற்றி வருகின்றார். அறுபதுக்கும் மேற்பட்ட ஆய்வுக்கட்டுரைகளை வெளியிட்டுள்ளார். பல்வேறு கருத்தரங்குகள் மற்றும் அறக்கட்டளைத் தொடர் சொற்பொழிவுகளில் உரையாற்றியுள்ளார். 2007 ஆம் ஆண்டு முதல் ஆற்றுப்படுத்தும் மையத்தின் உறுப்பினராகவும் பணியாற்றி வருகின்றார். டோக் பெருமாட்டி கல்லூரியில் தேசிய நிறுவன தரவரிசை கட்டமைப்பு (NIRF) பதிவேற்றம் செய்யும் பணியினை 2018 ஆம் ஆண்டு முதல் தொடர்ந்து செய்து வருகின்றார்.

இத்தகைய சிறப்புடைய இவருக்கு தேனித் தமிழ்ச்சங்கமும் சி. பா. ஆதித்தனார் தமிழியல் ஆய்வுக் கழகமும் இணைந்து " தமிழ்ச்சுவைத் தேனீ " எனும் விருதினை வழங்கிச் சிறப்பித்துள்ளது.