1982 ஆம் ஆண்டு மே திங்கள் 10 ஆம் நாளில் கடலூரைச் சார்ந்த கி. பழனி - ப. மல்லிகா இணையர்களுக்கு மகளாகப் பிறந்த இவர் சு. செந்தில்குமார் என்பவரை வாழ்க்கைத் துணையாகக் கொண்டார். இவருக்கு செ. ஷிவானி எனும் மகள் இருக்கிறார். தனது பள்ளிப்படிப்பை கடலூர், அரசு மகளிர் மேல்நிலைப்பள்ளியிலும், இளங்கலைத் தமிழ்ப் பட்டப்படிப்பைக் கடலூர், சி. கந்தசாமி நாயுடு மகளிர் கல்லூரியிலும், முதுகலை மற்றும் ஆய்வியல் நிறைஞர் பட்டங்களை சிதம்பரம். அண்ணாமலைப் பல்கலைக்கழகத்திலும், முனைவர் பட்டப்படிப்பை தஞ்சாவூர், தமிழ்ப் பல்கலைக்கழகத்திலும் பெற்றவர். சிதம்பரம், அண்ணாமலைப் பல்கலைக்கழகத் தொலைநிலைக் கல்வி வழியாக மொழியியலில் முதுகலைப் பட்டமும் பெற்றிருக்கிறார். ‘கம்பராமாயணத்தில் கதைமாந்தர்கள்’ என்னும் தலைப்பின் கீழ் தஞ்சாவூர், தமிழ்ப்பல்கலைக்கழகத்தில் முனைவர் வ. குருநாதன் அவர்களின் நெறியாளுகையின் கீழ் முனைவர் பட்ட ஆய்வு மேற்கொண்டு, பட்டத்தினைப் பெற்றார்.

கடலூர், சி. கந்தசாமி நாயுடு மகளிர் கல்லூரியில் (2011 – 2014) ஆம் ஆண்டில் காலை நேரக் கல்லூரியில் விருந்தினர் விரிவுரையாளராகப் பணியாற்றி, பின் (2015 – 2022) இதேக் கல்லூரியில் மாலை நேரக் கல்லூரியின், தமிழ்த்துறை உதவிப் பேராசிரியராக பணியாற்றி வருகிறார். மாலைநேரக்கல்லூரி, முதுகலைத் தமிழ்த்துறைப் பொறுப்பாசிரியராகவும் தம் பணியாற்றி வருகிறார். முதுகலைத் தமிழ் சார்ந்த மாணவிகளுக்கு பங்கீட்டின் படி ஆய்வு நெறியாளராகவும், வழிகாட்டியாகவும் இருக்கிறார்.

இத்தகைய சிறப்புடைய இவருக்கு தேனித் தமிழ்ச்சங்கமும் சி. பா. ஆதித்தனார் தமிழியல் ஆய்வுக் கழகமும் இணைந்து " தமிழ்ச்சுவைத் தேனீ " எனும் விருதினை வழங்கிச் சிறப்பித்துள்ளது.