தேனித் தமிழ்ச் சங்கத்தின் ‘தேன் துளிகள் - கவியரங்கம் நிகழ்வின் இரண்டாம் அமர்வுத் தொடக்க விழா தலைவர் தேனி மு. சுப்பிரமணி தலைமையில், செயலாளர் சு.சி.பொன்முடி, பொருளாளர் ம. கவிக்கருப்பையா மற்றும் துணைச்செயலாளர் அ. முகமது பாட்சா ஆகியோர் முன்னிலையில் நடைபெற்றது. திருநெல்வேலி, பொதிகைத் தமிழ்ச்சங்கத்தின் தலைவர் தமிழ்ச்செம்மல் பே.ராஜேந்திரன் அவர்கள் கவியரங்கத்தைத் தொடங்கி வைத்துச் சிறப்புரையாற்றினார். தேனித் தமிழ்ச் சங்கத்தின் உறுப்பினர் மா. துரை (எ) கவிஞர் மதுரன் அவர்களது தலைமையில் 36 கவிஞர்கள் பங்கேற்ற ‘முதுமையைப் போற்றுவோம்’ எனும் தலைப்பிலான கவியரங்கம் நடைபெற்றது. கவியரங்கில் வாசிக்கப்பெற்ற கவிதைகளிலிருந்து மூன்று பரிசுக்குரிய கவிதைகளை மதுரை கவிஞர் இளவல் ஹரிஹரன் அவர்கள் தேர்வு செய்திருந்தார். தேர்வு செய்யப்பட்டவர்களுக்கு முதல் பரிசாக ரூ.500/-, இரண்டாம் பரிசாக ரூ.300/- மூன்றாம் பரிசாக ரூ.200/- மதிப்பிலான புத்தகப் பரிசினையும் பாராட்டுச் சான்றிதழையும், கவியரங்கில் பங்கேற்ற அனைவருக்கும் பங்கேற்புச் சான்றிதழையும் திருநெல்வேலி பொதிகைத் தமிழ்ச் சங்கத்தின் தலைவர் பே. ராஜேந்திரன் அவர்கள் வழங்கினார். முன்னதாக கவியரங்கத் துணை ஒருங்கிணைப்பாளர் பூ. ஆனந்தகுமார் வரவேற்புரையாற்றினார். சங்கத்தின் துணைச்செயலாளரும், கவியரங்க ஒருங்கிணைப்பாளருமான மு. ரேணுகாதேவி நன்றி கூறினார்.