தேனி பங்களாமேட்டிலுள்ள எம்.எம். மருத்துவமனை வளாகத்தில் 31-12-2024 அன்று தேனித் தமிழ்ச் சங்கத்தின் சிறப்புக் கூட்டம் சங்கத்தின் செயலாளர் எழுத்தாளர் தேனி மு. சுப்பிரமணி தலைமையில், பொருளாளர் அ. முகமது பாட்சா முன்னிலையில் நடைபெற்றது. கன்னியாகுமரிக் கடலின் நடுவே அய்யன் திருவள்ளுவர் சிலை அமைக்கப்பெற்று 25 ஆண்டுகளாவதைத் தொடர்ந்து நடைபெற்று வரும் வெள்ளி விழாவினைச் சிறப்பிக்கும் வகையில், திருவள்ளுவர் சிலையினைத் தர்ப்பூசனியில் செதுக்கும் நிகழ்வு நடைபெற்றது. இதில் தேனித் தமிழ்ச் சங்கத்தின் பொதுக்குழு உறுப்பினரும், காய்கனிச் சிற்பக் கலைஞருமான கலைவளர்மணி மு. இளஞ்செழியன் அவர்கள் மூன்று மணி நேரத்திற்குள் தர்ப்பூசனியில் திருவள்ளுவர் சிலையினைச் செதுக்கி, தேனித் தமிழ்ச் சங்கத்தின் செயலாளர் எழுத்தாளர் தேனி மு. சுப்பிரமணியிடம் வழங்கினார். இந்நிகழ்வில், டாக்டர் பாஸ்கரன், முன்னாள் நகர்மன்ற உறுப்பினர் ரெ. ம. தாமோதரன், டாக்டர் மோனிகா பிரீத்தி, செல்வ முருகதாஸ், பொன் கணேஷ் உள்ளிட்டோர் கலந்து கொண்டு பேசினர். கூட்டத்தில் பங்கேற்ற 25 பேர்களுக்கு திருக்குறள் நூல் பரிசாக அளிக்கப்பட்டது. முடிவில் நிருவாகக் குழு உறுப்பினர் கா. அய்யப்பன் நன்றி கூறினார்.